«دومان خییولو»نون «احمد عاریفین» شعرلرینین کؤچورمه سینه یازدیقی نقده بیر باخیش
ترک ائتمه دی سئودان بنی
«هر ایشی بیله نینه تاپشیرماق گرکدیر».
چیراق درگی سینین 1و2 اینجی سایی صفحه 11 ده (سئودان بنی ) «احمد عاریفین» شعرلرینین کؤچورولموشونو «دومان خییولو» نقد ائدیب و اوخوجولارا تاپشیرمیشدیر .منده اونون کؤچوره نی اولاراق الیمه فورصت سالیب بیر نئچه مساله یه اشاره ائتمه گیمی لازیم گؤردوم . اولسون کی بیر آز گئج اولوب (آخی ساغولسون وزارت ارشادی، منی بیر استراحت مجبوریتینده قویوب و اجازه وئریب بیر اؤزوموده یاداسالیب و نلر چکدیگیمی مورور ائله یم) .
بیرینجی مسآله بودور کی بو قارداشیمیز زحمت چکیب کیتابی دقتله اوخویوب یالنیشلیق لارین چیخاردیب و اوخوجولارا تقدیم ائدیب و بونا خاطیر اللری آغریماسین دئییب تشکر ائدیرم حقیقتا چوخ دیققت له باخیب و اصلاح ائدیب دیر .
وآمما قدیم نن دئمیشلر «ایشی ایش بیله نه تاپشیرارلار» ، چون کی بو عزیز قارداشیمیز نقد ائتدیگی ایشده گؤستریر کی چوخ ابتدایی و ادبی تنقیدین قایدالارین بیلمه دن احساسات اؤزره کیمسه دن آجیقلی کن الینه فورصت دوشن آدام کیمی کیتابی و اوندان چوخ مترجیمی نقد ائدیب و توپارلاییب دیر .
او اوزدن کی من ادبیات اوخویوب بیتیرمیشم آز- چوخ بیلیرم کی ادبی نقدین اؤزونه مخصوص تعریفی و قایدالاری واردیر و خوشبختلیکله آذربایجان ادبیاتیندا دا آدلیم یازارلاریمیز بو اوسلوبو و قایدالاری دفعه لرله یازیب ، یازیچیلارا بوراخیبلار .
هرنه دن اؤنجه بیر ساوادلی تنقیدچی قلم اله آلاندا اخلاقی و ادبی باخیشی و قلمی اونوتمامالیدیر ، یازیچینین و یا کؤچوره نین احوال و روحیه سین نظرده آلاراق قاعده اوزویله ایلک دفعه اثری تانیتدیریب اونون باره سینده وئریلن امک لری و اوندا اولان اؤزللیک لری خاطیرلادیب و سونرا او اثرده گئدن یالنیشلیقلارا اشاره ائدیب و اونو اصلاح ائتمه یه چالیشار . هئچ تنقید چی بیر اثری تام رد ائدیب اوخوجویا توصیه ائتمز کی نقد ائتدیگی اثری اوخومامالیدیر .
بیر ساوادلی و غرض سیز تنقیدچی بیلیر کی اثری نقد ائدنده اونون یا یازارینین باشینا تاپداماق و اونو میداندان چیخارماق حیسسی ،ادبیات قانونوندا خیانت ساییلیر . اثری اصلاح ائتمک یئرینه اونو قرنطینه ائتمه مه لیدیر .
بو نقدیده ائله ایلک باشلاناندان تنقید چی ایچه ریسینده کی حیرسی و و دؤیوشه چیخماسی نی آیدین جا بللندیریر .«ترک ائتمه دی یالنیش بیزی» بو یازی عنوان سئچیله رک، تنقیدچی قارداشیمیز اؤزون ائله یازی مئیدانینا گیرندن الی چوماقلی ویوروشلو گؤستریر.
ایکینجی مسآله :
پینار یایین ائوی 85 دن رسما یایین ایشلرین باشلاییب و ائله بطنینده کی تعهد اوزره آنا دیلینده یازیلان کیتابلارین یایماسینا ماراق گؤستریب وآددیم آتیبدیر ، دئمه میش بللیدیر کی ائله ایلک گؤنلردن ده بو شرایط کی بیزیم ادبیاتیمیزا حاکیم دیر، منیم کیمی بیر ناشرلر نلر چکیب و یاشامالیدیلار . یوزدن آرتیق تورک ادبیاتیندا و تاریخینده اؤزللیکله لاتینجا کیتاب مجوزی آلیب و یایماق نه دره لی- تپه لی یوللاری گئتمک ایسته ییر . اولسون کی بو یولدا شهر به شهر یوکومو دالیما آتیب چالیشما فورصتین الدن قویمامیشام .اؤزومو و حیاتیمی قوربان وئررکن مادی چتینلیکلرله دویوشرکن کیمسه یه ال اوزاتمادان ییخیلماییب و سیرانی بوراخمامیشام .ایندیده آیلاردیر کی چالشما پینارا یاساق اولارکن گئجه گوندوز ییخیلماماق اوچون دیشیمله و دیرناغیملا بورایا چاتدیردیقیم یایین ائوین ساخلاماق و اونون موشکولون حل ائتمک اوچون یوللار و سازمانلار اسیری اولموشام طبیعی دیر کی یالنیز اؤزومه و بیر تیکه چؤه کدن دئییل ،بلکه قبول ائتتیدیگیم آغیربیر مسئولیتی یئرینه یئتیرمک دیر ، یوخسا نشر ایشلریندن اؤنجه راحاتجا گزیب –دولانیب ،گئجه لر کابوس سوز باش یاسدیغا قویوب ،یازیب یارادیب آلقیشلانیب و ایچه ریمیده کی دویغولاریمی بوشالدیب راحاتلاییب و تانینیلیردیم دا حتی ،آمما بو ایشین آغیرلیغیندان دویغولاریمی دا نظره آلمایاراق بیر تک قادین باشیما جان آتمیشام یالنیز، کیمسه یه میننت یوخ ؛آمما تورک ادبیاتینا و اونون ساحه سینده چالیشنلارا دیققت چاتدیران و مسئولیت حیس ائدن کیمسه لر ندن حالیمیزدان خبرسیز قالیب تنقیدی ده دوشونمه ییرلر هئچ ؟
ایندیسه عزیز و محترم ادبیاتچی و تورک ادباتینین قارشیندا اؤزون مسئول سایان قارداشیم ،
نه زامان شخصا بیر دفعه زحمت چکیب یایین ائوینه گلیب و یا زنگ ائدیب و او یالنیش چاپ اتدیگیم کیتابین مقابلینده 90 نا یاخین یالنیش سیز و اؤزل چاپ ائتدیگیم کیتابلارا خاطیر
بارماق سایی اولان تورک انتشاراتلاردان بیریسینه یورولمایاسان دئییب و یا بیر ایکی خط ایشلریندن یازیب سان؟
ندن سیزی بو قده ر یالنیش لیق لار ترک ائتمک ایسته میر ، طبیعی دیر بیر ناشر دن بیر کیتابدا یالنیش یاییلا بیلر حال بو کی بو کیتابدا گئدن یالنیشلیق لار اونو ائدیت ائدن عزیزین سهوی دیر کی گاهدان دوز یازیلاری سهوه دونده ریب و گاهداندا تایپ اولموش شعرلری بیلمه دن سیلیب وغلط تایپ ائله ییب دیر . اونودا سوچلامیرام بلکه دئییرم سهو گئدیب و تکرار چاپدا اصلاح اولونا بیلردیر ده .
اگر بعضا یورقونلوق زوروندان دانیشدیقیم سؤزلر آجی و دادسیز یازیلیرسا منی باغیشلایین لوطفا. کیمسه نین اینجیمه سی آماجی عاقلیمین اوجونداندا کئچمه ییر ، بوتون تورک ادبیاتینین و دیلینین یولوندا امک وئرن عزیزلرین خاصصه چیراق درگی سینده چالیشان دوستلارین اللرین اوپوب یورولماسینلار دئییرم .
سایقی لارلا: شریفه جعفری
مدیر مسئول انتشارات پینار
+ يازار شریفه جعفری در شنبه 24 دی1390 و ساعت
23:28 |
